duniya vaalon raam-seeta ki nai kahaani sun lo
vaalmik se khub suni, ab meri zubaani sun lo
gali-gali sita roe aaj mere desh men
sita dekhi raam dekha aaj nae bhesh men
tumane naam suna sita ka main use dekh aaya hun
o dharm ke thekedaaron main ek nai raamaayan laaya hun
vo sita thi raamaayan ki jiti jaagati
ruthe raam se jo khoya pyaar maangati
gali-gali sita roe...............
raam ki lila dekh chuke koi us ki lila jaane na
raam yahaan sita yahaan, par koi pahachaane na
aage badh ke dekh deewaane tu hi in ka raam hai
is ke dil ko cheer ke dekh liya tera naam hai
gali-gali sita roe .......................
dharati phati sita chhupi kahin nazar aaye na
ye vo sita hai ki jise dharati bhi chhupaaye na
ye bhi sita vo bhi sita fark dekho bhaag men
vo aag se laut aai, ye hai abhi aag men
gali-gali sita roe................
bahan jis bhaai ki hai vo bhi khafa ho gaya
maan ye kisi laal ki hai vo bhi juda ho gaya
janak sita chhod de to kahaan jaae jaanaki
maan ise pahachaan ke bhi phir nahin pahachaanati
gali-gali sita roe.....................
kyon bharosa nahin is pe kya ye pyaar jhootha hai
bolo-bolo aansuon ka kya ye haar jhootha hai
is ki katha jhoothi hai to jhootha bhagavaan hai
jhoothii hai raamaayan saari aur jhootha raam hai
dharm jhootha, prem jhootha, jhootha hindustaan hai
deviyon pe dosh lage aaj mere desh men
sita to hai raam nahin aaj mere desh men
gali-gali sita roe..................
******************************************
